MRIdian – ViewRay

MRIdian nga ViewRay është pajisja e parë e radioterapisë në botë me një MRI të integruar në bord. Ajo mundëson trajtimin e tumoreve të konsideruara si të patrajtueshme më parë.

Çfarë është MRIdian (ViewRay)?

Deri pak kohë më parë, mjekët e përdornin rezonancën magnetike (MRI) për të parë tumoret dhe përdornin përshpejtuesit linearë (LINAC) për t’i trajtuar ato. MRI-LINAC është një zgjidhje revolucionare që kombinon të dyja teknologjitë në të njëjtën pajisje. MRIdian nga ViewRay është sistemi i parë në botë i radioterapisë së orientuar nga MRI-ja që mund të skanojë dhe të trajtojë në të njëjtën kohë pacientët me kancer. Ai është një zgjidhje e radioterapisë që mundëson integrimin e LINAC me teknologjinë e MRI-së në një dizajn kompakt, së bashku me softuerin për të lokalizuar, pikësynuar dhe gjurmuar pozicionin dhe formën e tumoreve, ndërkohë që jepet rrezatimi.

Si funksionon MRIdian (ViewRay)?

Në mënyrë të ngjashme me radioterapinë konvencionale, pacienti vendoset në një tavolinë dhe për të përcaktuar indet e synuara kryhet MRI-ja. Zona e tumorit dhe indet e shëndetshme përreth mund të bëhen qartësisht të dukshme me ndihmën e MRI-së. Imazhi në kohë reale i ndihmon mjekët të kontrollojnë procesin e trajtimit gjatë rrezatimit. Në rast se vihet re një lëvizje e rëndësishme nga ana klinike e objektivit ose e indeve të shëndetshme, mjekët mund të rregullojnë objektivin dhe të ri planifikojnë trajtimin ndërkohë që pacienti ndodhet ende në shtratin e trajtimit. Një skanim i ri me MRI kryhet para çdo seance trajtimi, duke bërë të mundur një trajtim të përshtatur sipas anatomisë ditore të pacientit.

Pacientët luajnë një rol aktiv në radioterapinë me MR-LINAC. Gjatë trajtimit, ata mund të monitorojnë tumorin në një ekran dhe të rregullojnë frymëmarrjen e tyre për ta mbajtur atë brenda kornizës së shënuar. Pas përfundimit të seancës së trajtimit, pacienti mund të shkojë menjëherë në shtëpi.

Dallimet midis MRIdian dhe trajtimeve konvencionale të bazuara në LINAC

MRIdian është një teknologji e re për radioterapi të avancuar. Metoda e re terapeutike zgjeron kufijtë e radioterapisë. Për shkak të aftësisë së saj për të parë mirë në indet e buta dhe për të monitoruar shpërndarjen e rrezatimit në kohë reale, terapia me rrezatim e orientuar nga MRI-ja lejon trajtimin e tumoreve më të vegjël ose të vështirë për t’u arritur, tumoreve të vendosura afër strukturave kritike ose tumoreve që lëvizin, (për shembull gjatë frymëmarrjes). Krahasuar me radioterapinë konvencionale, MRIdian ofron disa veçori të avancuara, përkatësisht:

Ofron imazhe të vazhdueshme në kohë reale
Iu mundëson mjekëve të shohin qartë tumoret, edhe në indet e buta
Mundëson arritjen e tumore të vështirë për t’u arritur ose tumoreve që lëvizin, në gjoks ose në bark
Gjurmon lëvizjet e tumoreve dhe indeve të shëndetshme gjatë rrezatimit
Ofron përshtatje të planifikimit të radioterapisë në kohë reale
Ofron regjistrim me video gjatë procesit të trajtimit dhe bën të mundur vëzhgimin e progresit
Mundëson dhënien e rrezatimit me doza më të larta dhe në mënyrë më precize
Shmang nevojën për shënues invazivë dhe të kushtueshëm dhe zgjerues të indeve

Përparësitë e MRIdian (ViewRay)

Sistemi MRIdian LINAC ofron disa përfitime të rëndësishme për pacientë të caktuar:

Vëzhgim i përmirësuar i tumorit në kohë reale
Kufij më të ngushtë dhe më pak rrezatim në indet e shëndetshme përreth
Zvogëlimi i numrit të seancave të trajtimit
Reduktimi i efekteve anësore për pacientin
Siguri dhe efikasitet i përmirësuar i radioterapisë
Përmirësim i rezultateve kundër tumoreve të vështira për t’u trajtuar

Sëmundjet që mund të trajtohen me MRIdian (ViewRay)

MR-LINAC mund të përdoret për të gjitha tumoret në të gjithë trupin. Megjithatë, ai ofron avantazhe të rëndësishme për pacientët me kancer të mushkërive, kancer të prostatës, kancer të barkut, tumore dhe metastaza të mëlçisë, dhe kancerit të pankreasit në veçanti. Gama e aplikimit të tij përfshin: gjirin, gjëndrat limfatike periaortike, mushkëritë, veshkat, fshikëzën e urinës, gjëndrat limfatike të legenit, zonën e kokës dhe qafës, rrugët biliare, stomakun, qafën e mitrës, gjëndrën mbi veshkore, orbitën e syrit, kockën, shpretkën, tumoret gjinekologjike të pelvisit, kraharorin, harkun e aortës, pankreasin, zemrën, prostatën, mesenterin, barkun (indet e buta), gjëndrat limfatike të qafës, rektumin, gjëndrat parotide, pelvisin, shtyllën kurrizore, ezofagun, tiroiden, zorrën e trashë, mëlçinë, ekstremitetet, gjëndrat limfatike mediastinale, indet e butë të pelvisit, trurin, mitrën, ijët, fshikëzën e tëmthit, gjëndrat limfatike të gjuhës, nazofaringu, vezoret, brinjët, timusin.

Cilat lloje të kancerit trajtohen me MRIdian?

MRIdian përdoret kryesisht për trajtimin e:

Kancerit të kokës dhe qafës
Kancerit në mushkëri
Kancerit të prostatës
Kancerit të mëlçisë
Kanceret gjinekologjike
Kanceret gastrointestinale
Kancerit të pankreasit
Kancerit të kanalit biliar (kolangiokarcinoma)
Kancerit të gjirit
Kancerit të veshkave
Sarkomat e indeve të buta

MRIdian ofron një mundësi për të parë dhe gjurmuar indet e buta dhe tumoret në kohë reale. . Kjo mundëson ri-planifikimin e kursit të trajtimit në tavolinë nëse është e nevojshme. MRIdian mund të përdoret në të gjitha tumoret, por është veçanërisht i favorshëm në vendet ku trupi ka një shkallë të caktuar lëvizjeje: tumoret e vendosura në bark, rajonet e kraharorit, etj. Tumoret në këto rajone janë në lëvizje edhe gjatë frymëmarrjes normale. Prandaj, zona e tumorit dhe indet e shëndetshme përreth mund të vizualizohen qartë (janë qartësisht të dukshme) me ndihmën e MRIdian. Në rast të zbulimit të një lëvizjeje klinikisht të rëndësishme të objektivave ose indeve të shëndetshme, mjekët janë në gjendje të rregullojnë objektivin dhe të ri planifikojnë trajtimin ndërsa pacienti është ende në tavolinë. Duke ndjekur të dhënat e çdo seance trajtimi, përpara seancës tjetër mund të kryhet një skanim i ri me MRI. Ai lejon një trajtim të përshtatur në përputhje me anatominë e përditshme të pacientit.

Me MRIdian, është e mundur të gjurmohet tumori dhe të jepet trajtimi në kohën e duhur dhe në pozicionin e synuar. Ai lejon trajtimin e tumoreve të vështirë për t’u arritur, tumoreve të vendosura afër strukturave kritike ose tumoreve që mund të lëvizin gjatë funksioneve normale trupore si frymëmarrja. Kjo e bën terapinë me rrezatim të udhëhequr nga MRI unike dhe më efektive në krahasim me teknologjitë e tjera. Për më tepër, terapia MRIdian ofron rezultate më të mira me pak ose aspak efekte anësore ose komplikime.

Çfarë duhet të pres pas trajtimit MRIdian?

Pasi bordi mbi tumorin vendos të kryejë trajtimin tuaj me metodën MRIdian, udhëtimi i trajtimit përbëhet nga 4 hapa: simulimi, planifikimi, trajtimi dhe ndjekja. Trajtimi MRIdian kryhet në 1-5 seanca. Me MRIdian, është e mundur të rritet doza duke e mbajtur indin e shëndetshëm të padëmtuar. Kështu, radioterapia MRIdian finalizohet me më pak fraksione se radioterapia konvencionale. Në varësi të lokalizimit dhe llojit të tumorit, një seancë do të zgjaste afërsisht nga 25 deri në 60 minuta. Ju mund të shkoni në shtëpinë tuaj ose në dhomën e hotelit pas çdo seance trajtimi. Pas një jave, ju ktheheni përsëri në spital për një ekzaminim kontrolli dhe analiza. Sipas tumorit tuaj, mund të planifikohet trajtimi pasues. Për shembull, nëse MRIdian përdoret për një rast të kancerit të pankreasit, pacienti mund të ketë nevojë të operohet pas trajtimit. Nga ana tjetër, nëse një pacient vuan nga kanceri i lokalizuar i prostatës, ai mund të shërohet me trajtimin MRIdian dhe nuk do të ketë më nevojë për trajtim shtesë.

Cilat janë disavantazhet e MRIdian?

Të gjitha trajtimet me radioterapi mund të sjellin disa efekte anësore. Efektet anësore të MRIdian janë afërsisht të ngjashme me ato të trajtimeve të tjera me rrezatim. Ato janë zakonisht të përkohshme dhe mund të rezultojnë në probleme të frymëmarrjes, tretjes, urinimit ose sistemit riprodhues. Përveç kësaj, disa pacientë ka të ngjarë të vuajnë nga lodhja, të vjellat, acarimi i lëkurës dhe humbja e flokëve. Sidoqoftë, MRIdian sheh dhe gjurmon indet e shëndetshme dhe tumoret në kohë reale, dhe për rrjedhojë, dërgon rrezatimin tek tumori me saktësinë maksimale dhe shkakton dëme minimale në indet e shëndetshme. Gjatë trajtimit, rrezatimi synon vetëm tumorin. Nëse tumori është jashtë zonës së trajtimit, sistemi automatikisht ndalon rrezatimin duke ulur kështu rrezikun e toksicitetit. Efektet anësore të mundshme varen nga zona e trajtimit. Për shembull, pas trajtimit të kancerit të prostatës, disa pacientë përballen me probleme të përkohshme të urinimit ose defekim të shpeshtë dhe të ujshëm.